Actualitats
Tsipras demissiona e prepausa d’eleccions anticipadas
Lo movement Syriza es a viure de moments convulsats a l’interior pr’amor que lo govèrn a acceptat las reformas impausadas per Euròpa. Tsipras se presentarà a la reeleccion
Lo primièr ministre grèc, Alexis Tsipras, a anonciat ièr de ser que demissiona e que convòca d’eleccions avançadas que se faràn, probable, lo 20 de setembre que ven. Dins un messatge oficial emés per television, Tsipras a demandat als grècs de decidir eles “qual deu dirigir lo pòble grèc dins l’avenidor”. Reconeis que l’acòrdi qu’a signat amb las institucions europèas es pas lo melhor, e qu’es pas manco çò qu’el voliá, mas defend qu’el a obtengut qualques causas coma la restructuracion del deute. “Ai la consciéncia tranquilla e soi fièr del trabalh qu’ai fach”, çò a dich lo primièr ministre, que se presentarà a la reeleccion.
Tsipras s’èra ja reünit dimècres amb lo president del país Prokopis Pavlopuolos per li comunicar sa decision de demissionar e de convocar las eleccions anticipadas.
Syriza es a viure de moments convulsats a l’interior pr’amor que lo govèrn a acceptat las reformas impausadas per Euròpa. De fach, la setmana passada, mai de quaranta deputats de la seccion mai dura de Syriza se rebellèron e volguèron pas sosténer lo plan de salvament. Aquela division es benlèu la rason qu’a butat Tsipras a avançar las eleccions.
Grècia recep 23 miliards del salvament
Lo tresen salvament per Grècia comencèt de se far efectiu ièr de matin. Lo Mecanisme Europèu d’Estabilitat (MÈDE) autorizèt la transaccion de 26 miliards d’èuros, lo primièr tròç del prèst que recebrà lo govèrn d’Alexis Tsipras. Lo primièr movement foguèt un mandadís de 3,4 miliards dirèctament a Francfòrt a la sedença de la Banca Centrala Europèa (BCE) e de 7,16 miliards als sòcis europèus, correspondent al prèst que faguèron en julhet per recapitalizar las bancas grègas.
D’aqueles 26 miliards recebuts, Atenas ne deu consagrar 13 a pagar de devolucions de prèstes e de facturas acomoladas.
Segon l’acòrdi, lo programa de salvament a una vigéncia de tres ans e poirà arribar fins als 86 miliards d’èuros. En contrapartida, Grècia deu aplicar d’ajustaments fòrça durs coma de reduccions de las pensions, un aument de l’IVA, de privatizacions e d’autras mesuras d’austeritat.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Se acò de posicionar lo deute vol dire que lo diner que los bancs privats alemanys dels seus negocis falhits e que per obra e gràcia a l'ajuda dels partits de dretas grecs, feren avalar a l'estat grec los negocis privats de sos amiguets alemanhs, e la causa que l'estat grec hagués de contreure lo 80% del deute. Se acò de posicionar vol dir pagar pas aquest 80 % ,o pagar-los sinedie, la causa milhora. Mas cresi pas que vol dire?. Mas passat l'estiu Sipras hauria d'insistir amb que posicionar, vol dire pagar quan es pugui i negar-se a pagar los interesses. Quan es faci la campanha electoral sa proposta hauria de ser de que aqueste 80% es paga pas e los interesses tampau. Aleshores seria un posicionament rasonable, havent aconseguit capitar amb l'economia.
1) Escrivètz : « Lo govèrn a acceptat las reformas impausadas per Euròpa. » Quicòm qu'es IMPAUSAT non s'accèpta pas : s'endura, çò qu'eticament, filosoficament e politicament, a pas res a veire. Acc!èpti pas ieu la dominacion francesa d'Occitania, mas l'enduri, çò qu'es plan diferent, ne convendretz.
2) Quora escrivètz « la seccion mai dura de Syriza », supausi qu'entendètz per aiçô la seccion mai democratica e fisèla a sos engatjaments politics inicials ? Vesi pas gaire çô qu'aquò pòt aver de "dur". Determinats e leials serián d'adjectius fòrça mai adaptats per descriure aquel quarantenat d'Esparciats qu'afrontan solets las armadas milantas dels Xercès e autres Darius de l'ultraliberalisme dictatorial europèu. Çò dur e inuman, dictatorial e extremista, es precisament la politica ultraliberala impausada a totes los estats membres per Euròpa, al mesprètz de tota votacion quina que siá.
3) Parlatz d'un "salvament" de Grècia. Mas enfin, non se salvarà pas un estat ja subrendeutat e non-solvable e l'endeutant encara mai !!! Es pas ieu qu'o expliqui, mas la quite Lagarda del F.M.I.
4) Ne cal acabar amb aquela fotuda Euròpa que trepeja sens vergonha l'expression mai evidenta e legitima del sufratge universal. O Euròpa emancopa los pòbles, e es la nòstra Euròpa, o los alièna a la dictatura dels mercats, e n'avèm pas ges de besonh, de cap de biais. Es pas fotuda d'impausar a França una politica linguistica digna de la pus mendra de las exigéncia per poder integrar l'ensemble ! Alavètz, explicatz-nos a qué nos servís, se que non a impausar, còsta que còste una politica ultraliberala a de pòbles que i an tot a perdre, res a ganhar, e que ne vòlon pas ?
Aquì un que lo pòble li fa pas paur!
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari